ویجاران

---

آنا یوردوم ویجاران

آی ویجاران باشون باخور استانا

سندن آیری دوشدوم گتدیم تهرانا

چوخ ائللرون کوچدی گتدی گیلانا

سنده گزن ائللر گزسین وار اولسون

یسین ایچسین همیشه لیک شاد اولسون

آی ویجاران اولار سنده گزللر

کورپه بالالاری قاچوب گیدللر

هم اوتلالار هم نه نه لرین امه للر

اوچی گورجگ داغدان داشدان قاچالار

یل مثالی تلون باشین آشالار

آی ویجاران بابا گزن یرلری

چخماز خاطریمدن چوخ زحمتلری

آباد ائدوب تمام اول دوروبری

اما وفا ائدموب گتدی دنیادان

رحمت ائدسین اول کیشینی یارادان

آی ویجاران عالی سویوق سویون وار

باش طرفده قدیم میاروانون وار

یاخشی بیر همسایه گورگور قایون وار

اوشاقلار سسینه قولاق آساللار

اونون دوره سینده مال اوتارالار

آی ویجاران گوزل گور گور قیه سی

مه گلنده شئی لر دره تپه سی

اوت علف ایچینده کهلیک فره سی

او نازنین یرر خرابه قالدی

تمام صاحبلری قربتده قالدی

آی ویجاران فلک ایشین گوروبدی

بیرینی آغلادوب بیرین یوروبدی

قدیم کیشیلر کوچوب تمام گیدوبدی

اولارون یرینه دای گلن اولماز

قوجالارون قدرین هیچ بیلن اولماز

                                                        شاعر:حاج همزه علی همتی

---